Nagpanawagan ni National Electification Administrator Edgardo Masongsong iti publiko iti nainsiriban a panagusar iti koriente  ken iti pananggutigot nga agbuya kadagiti mangted adal ken napateg nga impormasion imbes a pasig lattan a pagkakatawaan.

Daytoy ti kangrunaan a pampanunot nga imburayna iti panagsaritana  idi August 30 iti inagurasion ti kabarbaro a headquarters ti Nueva Ecija Electric Cooperative, Inc.  NEECO-1 San Isidro, Nueva Ecija.

Binigbig ni Masongsong a ti 49 a tawenen iti  rural electrification program,  daytoy ti nangted ti gundaway nga ad-adu pay a Filipinos a makapagbuya iti telebision ken dadduma pay a mass media ngem mangnamnama nga usarenda koma daytoy a mang-edukar kadakuada.

Sapay koma ta agbuyatayo iti damdamag: agbuyatayo kadagiti programa a mangted ti pannakaammo kas koma iti panagnegosio gapu ta dagitoy ti kangrunaan nga ikalkalikagum ti rural electrification, daytoy ti kuna ti NEA administrator

Innayonna a sapay koma ta agtultuloy nga agballaigi ti rural electrification program. Sapay koma ta saan laeng a ti agbuya iti teleserye wenno entertainment ti ipaay ti rural electrification.

Iti panagadal a naparuk-atan idi Marso itay napan a tawen babaen ti Kantar Media, ti global media intelligence firm, TV ti kangrunaan nga maus-usar kadagiti rural ken urban areas iti baet ti kaadda ti social networks ken ti internet.

Dagiti primetime programs iti nagbaetan iti alas otso ti rabii agingga iti alas dies ti rabii ti kaaduan ti agbuybuya iti telebision segun iti 2016 survey manipud kadagiti 10,000 a napagsaludsodan.

Inulit ni Masongsong nga adda pay laeng agarup 12 milyon a Filipinos iti intero a pagilian a nailumlom iti kinapanglaw gapu ti kaawan ti serbisio ti koriente.