Nainbaligian ti pannakaorganisar ti 515  assosasion dagiti Member-Consumer-Owners ti INEC wenno ti INEC Association of Member-Consumer-Owners (IAMCO) manipud iti 559 a barangays iti probinsia idi March 21, 2019.  Ti MCO empowerment program ti mangorganisar ti IAMCO barangay chapters iti amin a nabatbati pay a barangay sakbay nga agngudo ti 2019.

Naorganisar ti assosasion a paset ti programa ti National Electrification Administration(NEA) a mangikalikagum iti nalawlawa a pannakibiang ken pannakipagaset dagiti MCOs iti programa ti EC a Sustainable Rural Electrification Program.

Kangrunaan a panggep ti programa ti mangnayon pay ti partisipasion dagiti MCOs iti aktibidad ti kooperatiba ken iti pannakaammoda iti nagduduma a programa ken ar-aramiden ti kooperatiba, panagbalin dagiti MCOs a responsable para iti panagsayaat ti kooperatiba ken dagiti komunidadda.

Maobserbar iti napalpalabas a tawen, aginnadayo ti relasyon ti electric coop ken dagiti MCOs.  Dadduma nga MCOs ket dida kayat nga ibilang ti bagida nga agtagikua iti kooperatiba isu nga adu kadakuada ti saan a mangikankano iti kapateg ti panagatendar iti Annual General Membership Assemblies ken panagbutos iti  district elections ti Board of Directors.

Iti babaen ti IAMCO, nasirmata ti Rural Electrification Program a mangrubrob ken mangiduron iti Rural Development Program gapu ta mamati ti INEC a saan nga agsardeng ti rural electrification iti  sapasap a pannakaidanon ti koriente no di ket iti agtultuloy a panagdur-as.

Kabayatan iti organizational meetings,  sangapulo (10) laeng a representante manipud iti kada barangay ti naawis a mangbukel ti konseho dagiti opisyales a mangidaulo iti organisasion.  Apaman a mapabileg ti liderato dagiti napili a mangibagi, amin nga MCOs iti barangay ti agkikita para iti organizational meeting iti intero a barangay.

Amin nga organisado nga  IAMCO chapters ket masapul nga adda ti mangibagi kadakuada para iti amin a sektor ti Agrikultura, Babbai, Relihion, Edukasion, Negosio, Civic, Media, Brgy. Council, Gobierno ken Agtutubo.