Nababa a boltahe ti koriente iti amianan nga ili Ilocos Norte Nasungbatanen.  Daytoy ket gapu iti pannakapapintas ken pannakalpas a pannakaingato ti  dua (2) kangrunaan a distribution system idi December 19, 2018.

Ti distribution voltage upgrading project ti pinundoan ti Gobierno ti Korea babaen ti grant wenno tulong babaen ti Korea Institute for Advancement of Technology (KIAT) idi January 22,2018 nga aggatad iti 3.5 Bilyon a Korean won wenno 150 Milyon a Pisos.

Kangrunaan a panggep ti proyekto ti mangted ti suporta iti  inhinieria (engineering), panaggatang (procurement) ken konstruksion (construction) para iti pannakapasayaat ti boltahe (voltage upgrading) dagiti  linya ti koriente (distribution lines) iti akin-amianan a paset ti Ilocos Norte.  Karaman iti proyekto ti pannakasukat dagiti agdama a linia a nangakomodar iti nangatngato a boltahe ken ti pagkasapulan para iti pannakasukat dagiti insulators,  sub-station, porcelain, waya, poste ken dadduma pay.

Ti agatiddog iti 70 kilometro nga agdama ita a distribution lines ti mangserbi iti pakabuklan ti Burgos, Bangui, Dumalneg, Brgy Davila ken  Dilavo idiay Pasuquin ken idiay Pagudpud malaksid iti Brgy Pancian ken Pasaleng.

Dagitoy a lugar ti masarakan iti igid ti baybay iti probinsia a makapasar iti kanayon a kellaat a panagsuek ti boltahe a rason iti di naigagara a panagpukaw ti koriente gapu iti kinarasin ti distribution system.

Kabayatanna, nainballaigian pay ti pannakiyuswat ti  rehabilitasion ti MHPP idiay Brgy Pansian, Pagudpud babaen ti Bosung Greenpower Co. a kompania idiay Korea.

Manipud iti inagurasion na idi 1983, ti planta ket namin-adun a daras a natarimaan  ken napasayaat tapno maiyatiddog ti operasionna agingga iti 25 a tawen.  Nangrugi ti rehabilitasion ti planta idi July, 2017 ken daytoy ti manamnama nga agtultuloy a mangpaadu iti generation capacity tapno masuportaran ti kasapulan a koriente idiay Adams, Bangui ken Pagudpud.

Ti seremonya iti pannakalpas dagitoy a proyekto ti inatendaran da Korean Embassy Commercial Attach Mr. Kim Jung-Ju, Director General ti International Cooperation Division of Korea Institute for Advancement of Technology (KIAT) Mr. Jung Jae Han, KEPCO Philippines President Mr. Go Jae Han, KPS President Mr. Huh Riyang, Bosung Powertec Chairman Mr. Lim Do Soo, ken  Deputy Administrator Artis Nikki Tortola on behalf of the National Electrification Administration.